Айдоочуну кокустан атып алган инспектордун окуясы. Тергөөнү УКМКнын жана прокуратуранын кызматкерлери жүргүзөт

Бишкекте милициянын кайгуул кызматынын инспектору менен айдоочунун ортосунда уруш чыгып, инспектор кокустан аны атып алды. Аталган окуя боюнча тергөө ишин Улуттук коопсуздук мамлекеттик комитетинин жана прокуратуранын кызматкерлери жүргүзөт. Бул тууралуу ИИМдин басма сөз кызматынан кабарлашты.

Билдирүүдө айтылгандай, толук кандуу жана объективдүү тергөө үчүн кайгуул кызматынын инспекторуна карата бардык териштирүү аракеттери прокуратуранын жана УКМКнын кызматкерлери тарабынан жүргүзүлөт.

Белгилей кетсек, 27-августта саат 21:30 чамасында Жибек Жолу жана Гоголь көчөсүндө милициянын кайгуул кызматынын кызматкерлери нөөмөттө турган учурда карама-каршы көчөдө 1989-жылы туулган Ч.А. аттуу жаран RaV-4 унаасы менен бара жаткан. Ал жол эрежесин бузгандыгы үчүн кызматкерлер тарабынан токтотулган.

Айдоочу документтерин берип, протокол толтурулуп жаткан убакта кетип калган. Бир аздан кийин келип кызматкерлерге уруш чыгарган. Ал патрулдук милициянын кенже инспекторуна кысым көрсөтүп, мушташууга аракет кылган. Мындан улам ортодо чыккан ызы-чуудан инспектордун кызматтык тапанчасынан кокустан ок чыгып, айдоочу жаракат алып, ооруканага жетпей каза болгон.

Бул факты Кылмыштардын жана жоруктардын бирдиктүү реестрине катталып, териштирүү иштери башталган.