Инспектордун огунан каза тапкан айдоочунун өлүмүн териштирүүнү Камчыбек Ташиев көзөмөлгө алды

Бишкектеги мечиттердин биринин жанында инспектордун кокусунан атып алган огунан улам каза болгон айдоочунун окуясы УКМКнын төрагасы Камчыбек Ташиевдин көзөмөлүндө. Иликтөөнүн жыйынтыгы боюнча бардык күнөөлүүлөр жоопко тартылат дешти Улуттук коопсуздук мамлекеттик комитетинин басма сөз кызматынан кабарлашты.

Мекемеден билдиргендей, инспектор киши өлтүрүү фактысы боюнча кармалды.

"27-августта саат 20:40 чамасында Жибек-Жолу жана Гоголь көчөлөрүнүн кесилишинде жол эрежесин бузгандыгы үчүн кайгуул милиция бөлүмүнүн кызматкерлери Тойота РАВ-4 унаасын токтотушкан. Айдоочу А.Ч. менен инспектор Ж.Днын ортосунда жаңжал чыккан. Кайгуул кызматкери кызматтык ок атуучу куралын айдоочуга карата колдонгон. Алган жаракатынан улам айдоочу ооруканага жетпей каза болгон.

Бул факты боюнча Свердлов районунун прокуратурасы тарабынан 321-берененин 2-бөлүгүнүн 2-пункту (кызмат абалынан кыянаттык менен пайдалануу) боюнча сотко чейинки өндүрүш катталып, тергөө иштери УКМКнын Бишкек шаары боюнча башкы башкармалыгына тапшырылды.

Чогултулган далилдердин негизинде ошол эле күнү инспектор Ж.Д. жогорудагы кылмышка шектүү катары кармалып, УКМКнын тергөө камак жайынын убактылуу кармоочу жайына киргизилди.

Белгилей кетсек, "баш калкалоо", "кызмат абалынан кыянаттык менен пайдалануу" жана "адам өлтүрүү" фактылары боюнча кошумча сотко чейинки 3 өндүрүш иши катталды. Жогорудагы кылмыш иштери Камчыбек Ташиевдин жеке көзөмөлүндө. Коомдук резонансты эске алуу менен УКМК бул кылмыш иштеринин иликтөөсүнүн жүрүшү жана жыйынтыктары тууралуу маалымат берип турат", - дешти маалымат кызматынан.

Маалымат үчүн:

Окуя 27-августта саат 21:30 чамасында Жибек Жолу кең көчөсү менен Гоголь көчөсүнүн кесилишинде орун алган. Анда милициянын кайгуул кызматынын инспектору менен айдоочунун ортосунда уруш чыгып, инспектор кокустан аны атып алган. Айдоочу алган жаракатынан улам көз жумган.

Аталган окуя 321-берененин бөлүктөрү ("кызмат абалынан кыянаттык менен пайдалануу", "ошол эле жосун", "курал же атайын каражаттарды колдонуу менен", "кокусунан ден соолукка оор зыян келтирүү менен") боюнча Кылмыштардын жана жоруктардын бирдиктүү ресстрине катталып, шектүү УКМКнын убактылуу кармоочу жайына киргизилди.

Бул окуяны тергөө ишин Улуттук коопсуздук мамлекеттик комитетинин жана прокуратуранын кызматкерлери жүргүзөт.

Интернетке инспектордун тапанчасын алып чыккан видеосу жарыяланды. Кийинчерээк маркумдун достору УКМКнын төрагасы Камчыбек Ташиевге жасаган кайрылуусун интернетке жарыялашты. Андан көп өтпөй маркумдун келинчеги делинген айымдын видеокайрылуусу тарады.

Бишкек ШИИББи инспектордун алгачкы көрсөтмөсү видеого жазылып калган учур менен окшошпой турганын, кылмышты жаап-жашыруунун белгилери жок экенин жана башка нуктагы маалымат берүү ниети жок экенин баса белгиледи.