Кабулдагы АКШнын ракеталык соккусунан каза болгондордун саны 9га жетти. Алар бир үй-бүлөнүн мүчөлөрү болушкан

Жекшемби күнү түштөн кийин Кабулда жасалган АКШнын ракеталык соккусунан каза болгондордун саны 9 адамга жетти. Бул тууралуу чет элдик басылмалар жазышты.

Маалыматка ылайык, каза болгон 9 адамдын баары бир үй-бүлөнүн мүчөлөрү болушкан. Алардын ичинен алтоо жаш бала болгону айтылды.

Эске салсак, кечээ, 29-августта Кабул аэропортунан анча алыс эмес жерге абадан ракеталык сокку урулганы кабарланган. Аба чабуулунан эки унаа жана адамдар жашаган турак үйдүн бир бөлүгү толугу менен кыйраганы айтылган. Андан соң аталган ракеталык чабуул Америка аскерлери тарабынан ишке ашырылганы аныкталган.

Көп өтпөй АКШнын куралдуу күчтөрү Кабулда ракеталык чабуул жасаганын тастыктап, себебин түшүндүргөн.

"АКШ аскерлери бүгүн коргонуу максатында Кабулдагы унаалардын бирине учкучсуз ракеталык сокку жасап, Вилаят Хорасан (Ислам мамлекети террордук тобунун бир бөлүгү) тарабынан ишке ашуу алдында турган Хамид Карзай эл аралык аэропортуна болгон коркунучту жок кылды", - деп билдиришкен алар.

Ошондой эле "сокку багытталган унаада орун алган катуу жарылуу, анын ичинде олуттуу өлчөмдө жардыргыч заттар болгонун ырастап турат", - деп белгилешкен.

Эске салсак, 15-август күнү талибандар Ооганстандын борбору Кабул шаарын да басып алышып, өлкөгө толук көзөмөл орнотушканын жар салган. Экстремисттик уюмдун өлкөнү басып алышы массалык баш аламандыктарды жаратып, жарандар мекенин таштап кетүүгө мажбур болушкан.

Белгилей кетүүчү нерсе, "Талибан" кыймылы Кыргыз өлкөсүнүн аймагында террордук жана экстремисттик уюм катары таанылып, ишмердүүлүгүнө тыюу салынган.