Президенттин Кубогу: 3-орун үчүн болгон беттеште "Ала-Тоо" "Достукту" 4:2 эсебинде жеңип алды

Чолпон-Ата шаарында өтүп жаткан көк бөрү боюнча президенттин Кубогу үчүн болгон мелдеште Жогорку Лигада "Достук" жана "Ала-Тоо" командалары 3-орун үчүн ат салышты. Бүйүр кызыткан беттеште эки тарап тең бири-бирине татыктуу атаандаштык көрсөтүп, бирок оюндун жыйынтыгында 4:2 эсеби менен "Ала-Тоо" командасы жеңишке жетишти.

"Ала-Тоо" командасына жеңиш алып келген упайды белгилүү улакчы Манас Ниязов, Бообек Шакирбек уулу жана Аскат Аскаров (2 ирет улак салды) алып келишти.

Ал эми Кыяз Ниязов "Достук" командасы үчүн 2 улак таштоого жетишти.

Муну менен "Ала-Тоо" командасы Эгемендүүлүктүн 30 жылдык майрамына арналган президенттин Кубогу үчүн болгон мелдеште Жогорку Лиганын 3-орунун камсыздады.

Эске салсак, "Ала-Тоо" командасы жарым финалдык баскычта Таластын "Ынтымак" командасына жеңилип, финалга чыга албай калган.