Атай Өмүрзаков жана «Тумар КР» бий тобу «Даңк мүнөтү» долбооруна катышуудан баш тартты

Кыргызстандык бийчи Атай Өмүрзаков жана «Тумар КР» бий тобу "Даңк мүнөтү: Олимпиада сезону" ("Минута Славы: Олимпийский сезон") долбооруна катышууну улантуудан баш тартышты. Атай Өмүрзаков социалдык баракчасына «Биз долбоордун жарым финалынан конкурс калыс өтпөй жатат деп баш тарттык. Андыктан бул жагдайды туура түшүнүп, кечирип коюшуңуздарды суранабыз», - деп жазган. Кыргызстандык бийчилер «Даңк мүнөтү: Олимпиада сезону» сынагына катышып, жарым финалга чыгышкан. Жеңүүчү акчалай сыйлыктан тышкары Сочидеги Олимпиаданын ачылыш аземине катышмак. Катышуудан баш тартышканы тууралуу бийчилер «Бизге конкурска жөн гана катышуунун кереги жок, биз жыйынтыкты көргөзгүбүз келген. Бирок сүйлөшүүнүн жүрүшүндө бардыгы эбак эле чечилип, алар ошол план боюнча даярдап жатышкандыгын түшүндүк. Биз конкурс таза өтпөй жатат деп эсептейбиз жана андан ары катышуудан баш тартабыз», - деп маалымат каражаттарына комментарий беришкен.