Түркмөнстандын өлкө башчысы ооган качкындарын кабыл алуудан баш тартты

Түркмөнстандын президенти Гурбангулы Бердымухамедов ооган качкындарын кабыл алуудан баш тартты. Бул тууралуу чет элдик маалымат булактары жазып чыгышты.

Маалыматка ылайык, ал бул аракетти өлкөдөгү эпидемиологиялык кырдаалга байланыштуу деп түшүндүргөн.

“Азыркы оор эпидемиологиялык шартта ооган качкындарын кабыл алуу боюнча туура чечимдер болушу керек”, - дейт өлкө башчысы.

Бул тууралуу Бердымухамедов 29-августта Европа кеңешинин президенти Шарль Мишель менен телефон аркылуу сүйлөшкөндө айткан.

Белгилей кетсек, түркмөн бийлиги пандемия башталгандан бери өлкөдө коронавирус инфекциясын жуктурган бир да учур катталбаганын билдирген.

Ошондой эле өлкө башчысы Ооганстанга гуманитардык жардам берүүгө жана өлкөдө стабилдүүлүктү орнотконго көмөктөшүүгө даяр экенин билдирген.

Эске салсак, 15-август күнү талибандар Ооганстандын борбору Кабул шаарын да басып алышып, өлкөгө толук көзөмөл орнотушканын жар салган. Экстремисттик уюмдун өлкөнү басып алышы массалык баш аламандыктарды жаратып, жарандар мекенин таштап кетүүгө мажбур болушкан.