Кызды тепкичтен тоголото чапкан окуя: Жабырлануучу видеону таратып жибергени үчүн клубдун кызматкерине арыз жазды

Буга чейин Бишкекте караоке-клубдардын биринде эркек киши кызды бетке уруп, тепкичтен кулатып жиберген видео тараган. Көп өтпөй Октябрь РИИБинен окуянын чоо-жайын билдирип, кол көтөргөн жаран анын жолдошу экенин жана жабырлануучу арыз жазуудан баш тартканын билдиришкен.

Милициянын маалыматына ылайык, интернет желесине тараган бул видеодон кийин жабырлануучу келиндин жолдошу үйүнө келбей жатканы белгилүү болду. Ал эми келин милиция кызматкерлери тарабынан коргоого алынган.

"Жогорудагы Д.А. аттуу жабырлануучу келин Октябрь райондук милициясына арыз менен кайрылып, видеону таратып жибергени үчүн караоке-бардын кызматкерине чара көрүүнү суранган.

Бул факты Кылмыштардын жана жоруктардын бирдиктүү реестрине 186-беренеси "жеке жашоодогу купуялыкты бузуу" менен катталып, сотко чейинки өндүрүш иши башталган. Ал эми учурда кол көтөргөн шектүү жарандын жүргөн жерин аныктоо жана кармоо боюнча иликтөө жана издөө иш-чаралары уланып жатат", - деп билдиришти Октябрь РИИБинин маалымат кызматынан.

Эске салсак, 29-августта Сухэ-Батор көчөсүндөгү клубда белгисиз эркек киши кызды чыканагы менен тепкичтен тоголото чапкан. Бул окуя Кылмыштардын жана жоруктардын бирдиктүү реестрине 266-берене "ээн баштык" менен катталып, шектүү жаран издөөгө алынган.