Чүйдө асынып алган келиндин окуясы. "Өзү кийип жүргөн кийимине асынып, тизелеп отурган абалда табылган"

Чүйдүн Жаңы-Чек айылында келиндин жансыз денеси бакка асынган абалда 1-сентябрь күнү табылган. Келин кийип жүргөн рубашкасына асынган. Бул тууралуу SUPER.KG порталына укук коргоо органдарындагы өздүк булактар билдирди.

"Айылдын четиндеги бакка рубашкасын байлап туруп эле тизелеп отуруп коюптур. Аны эртең менен мал кайтарып жүргөндөр көрүп, милицияга кабар беришкен", - деди өздүк булак.

Буга чейин Жаңы-Чек айылынын айыл өкмөт башчысы маркум Ысык-Көл облусунан болорун, сөөктү жакындары алып кеткенин билдирген.

Чүй РИИБинин нөөмөт бөлүмүнө 1-сентябрь күнү Жаңы-Чек айылынан келиндин жансыз денеси табылганы тууралуу маалымат түшкөн. Жерине ыкчам тергөө тобу барганда айылдагы мүрзөгө жакын жерден бакка асылган абалда жансыз дене табылган. Бул факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынган. Алгач денеге кароо жүргүзгөндө күч колдонуу белгилери болгон эмес. Ал эми келин 1987-жылы туулган К.Б. болгон.