Ысык-Көлдө скутердин ээси чет өлкөлүк жаранды сабап жаткан видеосу тарады

Ысык-Көлдө скутердин ээси чет өлкөлүк жаранды сабап жаткан видеосу соцтармактарда тарады. Окуянын видеосун жарыялаган автордун айтымында чет элдик жаран скутердин бузулганынан улам ур-токмокко алынган.

"Бүгүн ушундай бир маданиятсыздыкка күбө болдук. Скутердин ээси колдонуу эрежелерин өзү да түшүндүрө албагандыктан (чет өлкөлүк жаран англис тилинде сүйлөйт) чет элдик жаранды ур-токмокко алып кирген. Ошондой эле аны жергиликтүү райондук ички иштер башкармалыгына алып бара турганын айтып коркуткан. Биз жардамга чуркап барып, жагдайга күбө болгондон кийин скутердин чыпкасы кумдун айынан гана бүтөлүп калганын түшүндүк. Бир топко чейинки тартышуудан соң ал чет элдик жаранды 5000 сом төлөтүп, коё берүүгө макул болду.

Мындай көрүнүштөрдөн кийин биздин өлкөгө келүүнү ким кааласын? Ушундай жагдайларда дароо эле сабап кирүүдөн пайда чыкпасын түшүнүү үчүн дагы канча убакыт керек бизге?", - деп жазып калтырган видеонун автору.

Ал эми бул боюнча Ысык-Көл ОИИБине байланышканыбызда аталган окуя боюнча эч ким арыз менен кайрылбаганын билдиришти. Башкармалык да ал маалыматты интернет булактарынан көргөнүн жана тез арада териштирүү үчүн кызматкерлер жөнөп кеткенин кошумчалады.