"Кумтөр": "Мөңгүлөрдү жок кылууга макул болгон". УКМК экс-премьер-министр Жоомарт Оторбаевдин кармалганын маалымдады

"Кумтөр" иши боюнча мурдагы премьер-министр Жоомарт Оторбаев кармалды. Бул тууралуу Улуттук коопсуздук боюнча мамлекеттик комитетинен билдиришти.

Билдирүүгө ылайык, Жоомарт Оторбаев жүргүзүлгөн тергөө иш-аракеттеринин жыйынтыгына жана иште алынган далилдерге таянуу менен УКМКнын терөө камак жайынын убактылуу кармоочу жайына киргизилген.

"Жоомарт Оторбаев премьер-министр болуп турган кезде өкмөттүн Курчап турган чөйрөнү коргоо жана токой чарбасы мамлекеттик агенттигинин "Кумтөр" кенинин башкы планынын алкагында айлана-чөйрөгө тийгизген таасирин баалоо үчүн Кыргыз Республикасынын "Суу жөнүндө" Суу кодексинин жана Кыргыз Республикасынын мыйзамынын талаптарын бузуу менен "Кумтөр Голд Компанинин" («Центера Голд Инк.») чет элдик компаниясынын кызыкчылыгы үчүн буйрук алып, Лысый жана Давыдов мөңгүлөрүн мындан ары жок кылууга макулдук берген", - деп билдиришти УКМКдан.

Жоомарт Оторбаевди ведомстволор аралык тергөө тобу аны менен тергөө аракеттерин жүргүзүп, анын жыйынтыгы боюнча жакынкы 48 саатта Бишкек шаарынын Биринчи Май райондук соту тарабынан бөгөт коюу чарасы каралмакчы.