Чек ара кызматынын кызматкери адам өлтүрүү фактысына шектелип кармалды

УКМКнын Чек ара кызматынын кызматкери адам өлтүрүүгө шектүү катары кармалды. Бул тууралуу Чек ара кызматынын басма сөз кызматынан билдиришти.

Маалыматка ылайык, 18-сентябрь күнү Баткен облусунун Лейлек районуна караштуу Эски-Оочу айылынын четинде эркек кишинин жансыз денеси табылган.

Лейлек РИИБи тарабынан жүргүзүлгөн ыкчам тергөө иш-чараларынын жүрүшүндө, 6-сентябрдан баштап эмгек өргүүдө жүргөн 1991-жылы туулган С.П. аттуу аскер кызматкери бул окуяга шектүү катары өтүүдө. Алдын ала алынган маалыматтарга караганда, 17-сентябрь күнү аталган кызматкер эки досу менен үйлөнүү тойдон кайтып келе жатышып, ортодо чыр чыгып, мушташа кетишкен. Натыйжада бирөө каза болуп калган.

Учурда бул окуя боюнча тергөө иштери жүрүп жатат.