Пермдеги ок чыгаруудан 8 адам каза болду (видео)

Алдын ала маалыматтар боюнча, Орусиянын Пермь шаарындагы мамлекеттик университетинде ок чыгарган 18 жаштагы шектүү жаран кармалды. Ошол эле учурда айрым басылмалар анын өлтүрүлгөнүн жазып жатышат.

Маалыматка ылайык, бүгүн аталган окуу жайда 18 жаштагы Тимур Бекмансуров аттуу студент травматикалык курал менен студенттерге жана мугалимдерге ок чыгарган. Ал эми шектүү университетке ок чыгаруу алдында социалдык тармакка билдирүү калтырган.

"Билдирүүдө шектүү экстремист эмес экенин жана анын кылмышы террордук чабуул болбогонун кабарлайт. Ал ок атуучу курал сатып алуу үчүн акча чогултуп, көптөн бери кол салууга даярданып жүргөн. Ал эми шектүү куралга уруксат алуу үчүн медициналык кароодон өткөн. Ал буга чейин мурунку мектебине ок атууну көздөп жүргөн, бирок ал жогоруда аталган окуу жайды тандап алган", - деп жазылат маалыматта.

Ал эми университеттин басма сөз кызматы 8 адам каза таап, 24 адам жабыркаганын жарыялады.