Сауд Арабияда биринчи жолу аскер кызматындагы аялдар парадга катышты

Сауд Арабияда биринчи жолу ар кандай даражадагы аскер кызматындагы аялдар өлкөнүн 91 жылдыгына арналган аскердик парадга катышты. Бул тууралуу дүйнөлүк басылмаларда жарыяланды.

Чет өлкөлүк басылмаларда жазылгандай, параддар Эр-Рияд жана Жидда шаарларында өткөн. Иш-чарага жүздөгөн көрүүчүлөр катышты.

"Бул кадам мураскер ханзаада Мохаммед бин Салмандын "2030-жылга чейинки көз караш" демилгесинин бир бөлүгү болуп саналат. Анда ар кандай чөйрөлөрдөгү өлкөдөгү аялдардын статусун жакшыртуучу реформалар кирет.

Аялдарга Сауд Арабия армиясында, өлкөнүн стратегиялык ракеталык күчтөрүндө жана армиянын медициналык кызматтарында кызмат кылууга уруксат берилген.

Аталган өлкөдө аялдарга күйөөсүнүн же атасынын макулдугусуз өлкө жана дүйнө жүзүн кыдырууга, унаа айдоого, спорт залдарга, бассейндерге, спорттук мелдештерге барууга жана ресторандарда иштөөгө уруксат берилген. Ошондой эле жеке бизнесин ачып, армияда кызмат өтөй алышат", - деп айтылат маалыматта.