Олимпиаданын эки жолку чемпиону Роман Власов Акжол Махмудовго: "Жакында килем үстүндө жолугабыз"

"Лондон-2012" жана "Рио-2016" жайкы Олимпиада оюндарынын чемпиону, орусиялык балбан Роман Власов кыргыз балбаны Акжол Махмудов менен жакында килем үстүндө көрүшөрүн айтты. Мындай билдирүүнү ал Акжол Махмудовдун социалдык тармактагы баракчасына жарыялаган билдирүүсүнө жазып калтырган.

"Акула, акыры жакында килемден көрүшөбүз", - деп жазды Власов.

"Менин элим муну чыдамсыздык менен күтүп жатат. Өзгөчө мен сенин үстүңөн жеңишке жетишимди", - деп жооп берди Махмудов.

Роман Власов 77 килограмм салмакта Орусиянын атынан Олимпиадага бара турган негизги талапкер болчу. Бирок ал Орусия чемпиондугунда Александр Чехиркинге жеңилип калган. Ал эми экинчи мүмкүнчүлүгү болгон Польшада өткөн турнирде венгриялык балбанга бирдей упай менен утулуп, Олимпиадага баруу мүмкүнчүлүгүнөн ажырап калган.