Жалал-Абадда экстремисттик идеологияны жайылтууга шектүү жаран кармалды

Жалал-Абадда экстремисттик идеологияны жайылтууга шектүү адам кармалды. Бул тууралуу Жалал-Абад ОИИБинин басма сөз кызматынан билдиришти.

Маалыматка ылайык, 8-апрелде аймактык милицияга белгисиз жаран өлкөнүн конституциялык түзүлүшүн бузууга чакырган материалдарды таратып жатканы тууралуу маалымат түшкөн.

Бул факты Кылмыштардын жана жоруктардын бирдиктүү реестрине катталып, козголгон кылмыш иштин алкагында 51 жаштагы Х.М. аттуу жаран кармалды.

"Ал Кыргыз жергесинде тыюу салынган "Хизб-ут Тахрир Аль Ислами" уюмунун мүчөсү жана алардын идеологиясын коңшуларына тараткан. Мындан тышкары тыюу салынган уюмдун идеологиясын WhatsApp топторуна жайылткан. Шектүүнүн үйүн тинтүү учурунда далил буюмдар табылган. Соттун чечими менен шектүү эки айга камакка алынды", - деп айтылат билдирүүдө.