Сексуалдык кол тийбестикке каршы, алдамчылык, абактан качуу... Издөөдө жүргөн 6 адам Орусиядан кармалды

Алдамчылык, абактан качуу жана сексуалдык кол тийбестикке каршы кылмыштар боюнча издөөдө жүргөн жарандар Орусиядан кармалды. Бул тууралуу ИИМдин басма сөз кызматынан билдиришти.

Ички иштер министрлигинин Орусиядагы өкүлчүлүгү менен Орусия аймактык укук коргоо органдары биргеликте жүргүзгөн иш-чаралардын жүрүшүндө издөөдө жүргөн адамдарды кармашты. Алардын баары Кыргыз Республикасынын аймагында ар кандай кылмыштарды жасагандыгы үчүн издөөдө жүргөн.

Учурда кармалган 6 жаранды өлкөгө экстрадициялоо маселеси чечилүүдө. Алардын көпчүлүгү ири өлчөмдөгү алдамчылык фактысына шектелип издөөдө жүрүшкөн.