"Түрк, корей сериалдарын артта калтырат". Бишкекте "Жалбыз" телесериалынын бет ачары өттү

6-октябрда Бишкекте "Жалбыз" телесериалынын бет ачары өттү. Иш-чарага маданият, маалымат, спорт жана жаштар саясаты министри Кайрат Иманалиев баштаган бир катар көрүнүктүү ишмерлер, маданият өкүлдөрү катышты.

Сериалдын сценарийинин автору Жеңишкүл Өзүбекова сериал тууралуу төмөнкүлөргө токтолду.

"Бүгүн кыргыз телесериалынын тарыхында өзгөчө кубанычтуу күн. Элге тартуулай турган сериалыбыздын 36 сериясынын 12си даяр болду. Бүгүн "Жалбыздын" жүзүн ачып коёлу дедик. Бизге жардам берген адамдардын баарын ушул жерге чогулттук. Мен ишимди мага мамлекет эмне кылды дебей, мен кыйын учурда мамлекетке эмне кылдым деген ой менен жасадым. Сериалда мыкты актёрлер ойношту. Албетте, 100 пайыз мен ойлогондой болду дебейм, бирок 80 пайызы ишке ашты деп айта алам. Мен SUPER.KG порталына маек берген учурда "түрк, корей сериалдарын артта калтырат" дегем. Чын эле ошондой болот деп ишенем. Албетте, бааны эл берет. Биз колдон келишинче аракет кылдык. Сериал жашоодо болгон чыныгы окуялардын негизинде тартылды", - деди Жеңишкүл Өзүбекова.

"Жалбыз" 36 сериядан турган курч сюжеттүү, детективдик элементтерди камтыган, социалдык-лирикалык заманбап мелодрама. Сериалдын автору Жеңишкүл Өзүбекова, режиссёру М.Мамбетов. Башкы ролдордо Т.Абазова, А.Мукамбетова, Ө.Нурдинов, Т.Үмөталиева, Т.Апыев жана башкалар.

Эскерте кетсек, SUPER.KG порталы "Жалбыз" телесериалынын маалыматтык өнөктөшү болуп саналат.