Техастагы мектепте ок атууга шектелип 18 жаштагы окуучу кармалды

АКШнын Техас штатында жайгашкан Арлингтон шаарындагы мектептердин биринде ок чыгарган өспүрүм кармалды. Бул тууралуу аталган шаардын полиция кызматы билдиргенин чет элдик басылмалар жазышты.

Маалыматка ылайык, Арлингтон шаарынын полициясы мектептеги ок атууга шектүү катары аталган мектепте окуган 18 жаштагы Тимоти Симпкинс аттуу окуучуну кармаган. Ал окуядан кийин дароо унаа менен качып кеткени белгилүү болду.

Ошондой эле кылмышка шектүү өспүрүм учурда убактылуу кармоочу жайга киргизилгени маалымдалды.

Эске салсак, 6-октябрь күнү АКШнын Арлингтон шаарындагы мектептердин биринде ок атуу болгон. Андан 3 окуучу жана 1 эркек адам жабыркаганы кабарланган. Полиция кызматкерлери ок атуу окуучулар арасында чыккан жаңжалдан улам болушу мүмкүн экендигин билдиришкен.