Бишкекте төрөт үйүнөн уурдалган наристенин туугандары медиктерден күмөн санашууда

Бишкектеги №4-төрөт үйүнөн уурдалган наристенин туугандары дарыгерлерден күмөн санап жатканын айтышууда. Бишкек ШИИБи 6-ноябрда кыздын энеси 1975-жылы туулган Айниса Суранчиева ден соолугуна байланыштуу Улуттук госпиталга жаткырылгандыгы тууралуу маалымат берген. 

        Бүгүн, 8-ноябрда Суранчиеванын кайын сиңдиси Айзада Эсенбекованы таап, байланышканыбызда ал аталган иш боюнча SUPER.KG порталына маалымат берип, жеңеси М.Мамакеев атындагы Улуттук хирургиялык борбордо дарыланып жаткандыгын билдирди.  Анын айтымында, кыздын энесинин 8-октябрда каканак суусу кетип, №2-төрөт үйүнө барган. Бала маалына жетпегендиктен ал жакта “бизде вакуум жок” деп №4-төрөт үйүнө жиберишет. “№4 төрөт үйүндө эки күн операцияга даярдашып, 10-октябрда операция жасашат.  Ал жерде бир тууган эжеси дайыма жанында болуп турган. Бала жаңы төрөлгөндө вакуумда эки күн кармалып,  үчүнчү күнү палатага чыгарылат. Төрөт үйүнөн чыгууга даярдалып жатканда жеңемдин ичи ооруп, 2-3 күн уктабай чыгыптыр. Дарыгерлерден эч кандай жардам болбоптур”,- дейт Эсенбекова. 

    Операция жасаганда медиктер жатынын алып салып, эч кимге айтышкан эмес. Жатынынын алып салынганы тууралуу Суранчиева Улуттук хирургиялык борбордо гана билген. “Аны №4 төрөт үйүндө кесарево жасашканда жатынын алып салып, жеңебизге айтышкан эмес. Табарсыгына бычак тийгизип алышыптыр. Операциядан кийин суюктуктар бөлүнүп чыгышы үчүн түтүк коюш керек экен, аны да коюшпай, абалы оорлоп кеткенде 18-октябрда Мамакеев атындагы хирургиялык борборго (дарыгерлер өздөрүнүн катасын түшүнүп) жөнөтүшөт. УЗИден карашса ар жеринде суу (суюктуктар) топтолгон экен”,- деди Айзада Эсенбекова. 

“Биздин бала 2 килограмм 600 грамм болуп төрөлгөн. 4-ноябрда баланын тамагы жок дегенде биз  алып барып бергенбиз. Бала эртеси күнү жоголот. Жоголгондон кийин 5-6 саат бою медиктер милицияга кайрылышкан эмес. Сыягы, ошол учурда өздөрү бир нерселерди пландап, бир нерселерди чечишкен. Биз бир гана дарыгерлерден күмөн санап жатабыз”,- деп кошумчалайт Айзада Эсенбекова. 

Эске салсак, Бишкектин №4-төрөт үйүндө 5-ноябрь күнү саат 00:25те ымыркай уурдалгандыгы тууралуу маалымат түшкөн. Ымыркай кыз ушул жылдын 10-октябрында төрөлгөн. Энеси 1975-жылы туулган Айниса Суранчиева  ден соолугуна байланыштуу Улуттук хирургиялык борборго жаткырылган. Бул факты боюнча SUPER.KG порталынан кошумча маалыматтар алуу максатында  перинаталдык борборго 2 ирет кайрылганыбызда комментарий берүүдөн баш тартып коюшкан.