Кара-Суу районунда "Кадастр" мамлекеттик ишканасынын мурдагы жетекчиси жер сатуу фактысы менен кармалды

Ош облусунун Кара-Суу районунда "Кадастр" мамлекеттик ишканасынын мурдагы жетекчиси Ш.С. кармалды. Бул тууралуу УКМКнын басма сөз кызматынан билдиришти.

Маалыматка ылайык, Кара-Суу районунун Нариман айыл аймагындагы айыл чарба жерлерин жеке турак жай куруу үчүн мыйзамсыз сатуу фактысы боюнча сотко чейинки өндүрүштүн алкагында, бул кылмышка түздөн-түз тиешеси бар болуп 5-октябрь күнү 2015-2018-жылдар аралыгында Кара-Суу районунун "Кадастр" мамлекеттик ишканасынын башчысы болуп иштеген Ш.С. кармалган.

Кармалган жаранга кылмыш жасагандыгы жөнүндө билдирүү берилип, УКМК тергөө камак жайынын убактылуу кармоочу жайына киргизилген. Мурда бул факты боюнча Нариман айыл өкмөтүнүн башчысы жана аны менен бирге иштеген М.С., ошондой эле Кара-Суу районунун “Кадастр” мамлекеттик ишканасынын мурдагы жетекчисинин милдетин аткаруучу Б.Б. кармалган.

30-сентябрь күнү бул адамдарга кылмыш жасагандыгы жөнүндө билдирүү берилип, УКМКнын тергөө камак жайына киргизилген. Азыркы учурда бул ишке тиешеси бар башка адамдардын бетин ачуу үчүн бардык зарыл болгон ыкчам тергөө иш-чаралары жүргүзүлүүдө.