Тажикстан Орусиядагы жарандарына сакал-мурутуна кам көрүүгө чакырды

Тажикстандын Эмгек, миграция жана иш менен камсыз кылуу министрлигинин Орусиядагы өкүлчүлүгү Орусиядагы тажик эмгек мигранттары үчүн сунуштарды жарыялады. Бул тууралуу тажик басылмалары жазышты.

Маалыматка ылайык, Тажикстандын жарандарына орус жарандарын коркутпоо үчүн сакал-мурутуна кам көрүп, дайыма тарап туруу сунушталат.

"Эгерде сакал-мурутуңуз шариятка ылайык сакталса, анда башкаларды коркутпаш үчүн күн сайын тараңыз", - деп айтылат сунуштарда.

Мындан тышкары, Эмгек министрлиги тажик мигранттарын уруксат берилген жерлерде гана намаз окууга чакырат. Ошол эле учурда эмгек мигранттарына жумуштан кийин бош убакытта китепканаларга, театрларга, музейлерге баруу сунушу дагы айтылган. Бул орус элинин маданиятын, тарыхын, тилин үйрөнүү жана урматтоо катары сыпатталат.

Ошондой эле эгер мүмкүн болсо тажик жарандарына министрлик Орусиянын жогорку окуу жайларына сырттан окууну сунуштаган.