Айпери Медет кызы: "Дүйнө биринчилигине алтын медаль, кур алам деп баргам"

Бүгүн, 9-октябрда Норвегиянын борбору Осло шаарында өтүп жаткан күрөш боюнча Дүйнө чемпиондугуна катышкан кыргыз балбан кыздары Бишкек шаарына кайтып келди.

Анда Дүйнө чемпиондугунда коло медаль тагынган балбан кыз Айпери Медет кызы маанайы суз экенин билдирип, өз сезимдери менен бөлүштү.

"Мен Дүйнө биринчилигине алтын медаль, кур алам деп баргам. Тилекке каршы спортто бирде жеңүү, бирде жеңилүү болот экен. Мен үчүн оор болгон беттеш Эстониядан келген балбан кыз менен күрөшүү болду. Утуп келе жатып акыркы 30 секундда утулуп калдым. Машыктыруучуларыма терең ыраазычылык билдирем, буюрса алдыдагы беттеште ийгилик жаратам деген үмүттөмүн", - деди Айпери Медет кызы.

Эске салсак, Айпери Медет кызы күрөш боюнча Дүйнө чемпиондугунда 76 килограмм салмакта жарым финалда эстониялык балбанга 3:3 эсебинде жеңилип калган. Ал эми коло медаль үчүн болгон беттеште украиналык Анастасия Шустова аттуу балбан менен кез келип, 12:1 эсебинде жеңип, коло медаль тагынган.