"Менин ичиме Кудай кирип кетти" деп кыйкырып. Пермь шаарындагы мектепте 12 жаштагы окуучу ок чыгарды

Орусиянын Пермь аймагында 12 жаштагы мектеп окуучусу мектепке келип ок чыгарды. Бул тууралуу орус басылмалары жазышты.

Маалыматка ылайык, алтынчы класстын окуучусу "Сайга" мылтыгынан эки жолу ок чыгарган. Жабыркагандар жок. Учурда окуучу менен полиция кызматкерлери сүйлөшүп жаткандыгы белгилүү болду.

Сурак учурунда окуучу мектепке аны таарынтып жүргөн кызды атып салуу үчүн атасынын мылтыгын уурдап келгенин моюнуна алган.

Басылмалар жазгандай, ок атуу учурунда өспүрүм: "Менин ичиме Кудай кирип кетти" деп кыйкырган. Мектептин директору аны кармап калууга жетишкен, ал кабинетинен чыгып, ок аткан адамды бөлмөсүнө келүүгө көндүргөн.

Буга чейин 20-сентябрда Орусиянын Пермь шаарындагы изилдөө университетинде 18 жаштагы Тимур Бекмансуров аттуу жаран студенттерге жана мугалимдерге ок чыгарган. Анын кол салуусунан 6 адам каза болуп, 28 адам жаракат алган.