Казакстанда көп балалуу эне алимент төлөбөгөндүгү үчүн бир жылга эркиндигинен ажыратылды

Казакстандын Павлодар облусунда көп балалуу эне алимент төлөбөгөндүгү үчүн бир жылга эркиндигинен ажыратылды. Бул тууралуу Казакстандын жергиликтүү басылмалары жазып чыгышты.

Маалыматка ылайык, 48 жаштагы беш баланын энеси (улуусу 18де, кичүүсү 8 жашта) бир нече жолу полиция кызматына түшкөн. Бул үй-бүлө социалдык жактан аз камсыз болгондордун катарында каттоодо турган. Ошондой эле аял спирт ичимдиктерин ичип, айрым учурларда балдарын ачка, кароосуз калтырып койгон.

Кийин аял балдарга тарбия берүүгө толук кандуу көңүл бөлбөгөндүктөн, энелик укугунан ажыратылган. Чоң балдары интернатка которулуп, ал эми кичинекей балдарын туугандары алышкан.

Убакыттын өтүшү менен балдарды өз камкордугуна алгандар алиментке арыз беришкен, бирок аял балдарына жардам берүүгө аракет кылган эмес. Алимент төлөбөгөндүгү үчүн быйыл ал бир жылга эркинен ажыратылган.

"Соттолгон адамга анын укуктары жана милдеттери, ошондой эле жазаны өтөө мезгилинде коюлган талаптар түшүндүрүлдү. Кошумча эсепке алимент төлөшү керек деп бир нече жолу айтып жана балдар менен байланыш түзүүгө жардам берүүгө аракет кылышкан. Бир нече жолу аны жумушка орнотуу борборуна жөнөтүшкөн, бирок ал андан баш тарткан", - деп Павлодар облусунун пробация кызматынын башчысы Дамир Жаныбеков билдирген.

Белгилей кетсек, көп балалуу эне жаза мөөнөтүн орто коопсуздуктагы аялдар абагында өтөйт.

Ошондой эле соттун чечими күчүнө кире электиги белгиленет маалыматта.