"8 жаштагы кыз 23 жаштагы жигитке 3 миң долларга сатылды". Ооганстанда жакырчылыктан улам кыздарын сатышууда

Ооганстанда талибдер бийликке келгенден кийин өлкөдөгү гуманитардык кырдаал начарлап кеткен. Кээ бир ооган үй-бүлөлөрү кыздарын адаттагыдан эрте күйөөгө сатууну же турмушка берүүнү чечишкен. Бул тууралуу видеону "Настоящее время" жарыялады.

Балдарды никеге тургузуу жана бала сатуу Ооганстанда жаңылык эмес, бирок акыркы айларда мындай учурлар көбөйгөн.

8 жаштагы Ашо 23 жаштагы ооганга 3 миң долларга сатылган. Шукрие болсо болгону бир жарым жашта, бирок атасы аны 2 миң 800 долларга сатууну чечкен.

Ашонун апасы Бибигүл кызын үй-бүлө ачкачылыкка учурап, карыздарды төлөш керек деп сатып жибергенин айтууда.

"Бизде башка арга жок. Бул жакшы иш эмес. Кудай жана анын пайгамбары бизге мындай кылгыла деп эч качан айткан эмес", - дейт аял.

Эки кыздын атасы Мохаммад Ассан: "Ачкачылыктан жана качкындар лагеринде башыбыздан кечирип жаткан кыйынчылыктардан улам эки кызымды сатууга туура келди", - дейт.

Сатып алуучунун акчасы жок болсо, ата-эне анын ордуна мал же курал алууга даяр.

Калган эки кыздын атасы Кайлан: "Нажиба менин кызым. Мен аны 500 долларга саттым. Анын күйөөсү мага 250 доллар төлөп берди. Экинчи бөлүгүн төлөп берери менен кызымды алып кетет", - деген.

"Талибан" кыймылы бийликке келгенден бери түзүлгөн туруксуз кырдаалдан улам көптөгөн оогандыктар каржылык кыйынчылыктарды баштан кечирүүдө. Азык-түлүктүн баасы көтөрүлүп, улуттук валютанын курсу кескин төмөндөп, тышкы жардам азайган.

Маалымат үчүн: "Талибан" кыймылы Кыргыз өлкөсүнүн аймагында террордук жана экстремисттик уюм катары таанылып, ишмердүүлүгүнө тыюу салынган.