Мурдагы премьер-министр Данияр Үсөнов жетектеген корпорация Беларусь бюджетинен акча уурдаган деп шектелүүдө

Даниил Урицкий жетектеген Беларустун улуттук биотехнологиялык корпорациясы (БНБК) бюджеттен каражат чыгарган деп шектелүүдө. Бул тууралуу Беларусь өлкөсүнүн оппозициялык "The Бульба" телеграм-каналы жазып чыкты.

Маалыматка ылайык, The Бульбанын материалында аталган долбоор 5 жылдан бери толук кубаттуулукта иштей электиги, заводдордун көбү курула электиги, Беларусь менен Кытайдын биргелешкен ири долбоорунун баасы 733 миллион доллар экени айтылат. 2019-жылы "Кошт Урада" долбоору БНБКнын ишмердүүлүгүн изилдеп, корпорация түзүлгөн жана иштеген схема бюджеттик акчаны жеке бизнеске чыгарууга абдан окшош деген жыйынтыкка келген.

Эске салсак, улуттук биотехнологиялык корпорация жабык акционердик коом. Беларусь 25 пайыз акциясына гана ээлик кылат. Калганынын баары чет элдик компанияларга бөлүнгөн.

Данияр Үсөнов Даниил Урицкий деген ысым менен Беларуста жашайт деген маалымат жергиликтүү маалымат булактарына биринчи жолу 2017-жылдын декабрь айында чыккан.