Грузиянын абактагы экс-президенти Михаил Саакашвилинин эс-тутуму начарлап жатканы айтылды

Грузиянын абакта жаткан мурдагы президенти Михаил Саакашвилинин эс-тутумунда олуттуу начарлоо байкалууда. Бул тууралуу анын жактоочусу Ника Гварамия билдиргенин чет элдик басылмалар жазышты.

Жактоочусу саясатчынын ден соолугунда олуттуу начарлоо байкала баштаганын айтат.

"Өзгөчө ал адамдар менен баарлашууда жана эске тутууда көйгөйлөргө дуушар болгон. Башкача айтканда, айрым адамдардын аттарын эстей албай калып жатат. Сүйлөшүү учурунда кээ бир жакын досторун да эстей албай жатканы байкалууда", - деди Ника Гварамия.

Буга чейин Украинанын Жогорку Радасынын адам укуктары боюнча комиссары Людмила Денисова дагы Михаил Саакашвилинин абалы кескин начарлап кеткенин айтып чыккан. Ал абактагы президент анализдеринин начар чыкканын кат аркылуу жазганын билдирген.

Ошондой эле саясатчы 20 килограммга арыктап кеткенин жана 2 сааттык сүйлөшүүгө араң чыдап отурганын кошумчалаган.

Эске салсак, Михаил Саакашвили 1-октябрда камакка алынган. Ага бир канча жыл мурун өлтүрүлгөн Сандро Гиргвлиани аттуу банк кызматкеринин иши боюнча айып тагылууда. Саясатчы абакта ачкачылык жарыялаганы белгилүү.