"Кардарлар соода кылбай кетип жатышат". "Дордой" базарындагы соодагерлер электр жарыгынын өчүшүнө нааразы (сүрөт, видео)

Бишкек шаарындагы "Дордой" базарында соодагерлер беш күндөн бери электр жарыгы тынымсыз өчүп, сооданын жүрбөй жаткандыгын SUPER.KG порталына билдиришти.

Соодагерлердин айтымында, базардын айрым жерлеринде беш күндөн бери электр жарыгы маал-маалы менен өчүп, сооданын жүрүшүнө тоскоолдук жаратууда.

"Мен "Дордойдо" 15 жылдан бери иштейм. Мындай көрүнүш биринчи жолу болуп жатат. Беш күндөн бери электр жарыгы саат эртең мененки 9:30дан 15:00-16:00гө чейин өчүп жатат. Ал эми бүгүн такыр эле жок. Бул товардын өтүшүнө терс таасирин тийгизип жатат. Соода кылып алалы деп ушул сезонду күтөбүз.

Салыктарды убагында төлөйбүз. Электр жарыгы өчсө дагы салыктын өлчөмүнө кыскартуу болгон жок. Төлөөгө келгенде акчаны "сыгып" алышат.

Ал эми тиешелүү органдарга кайрылганыбызда, оңдоо иштери жүрүп жатканын жана эртең, 8-ноябрдан баштап электр жарыгы берилерин билдиришти. Негизи алдын ала эскертүү бериши керек эле", - дейт соодагер Жекшен Расулов.

Ошондой эле соодагерлердин бири электр жарыгынын жоктугуна байланыштуу кийимдердин өлчөмдөрүн таппай калып жатышканын, кардарлардын албай кетип жатканын билдирди.

Электр жарыгынын өчүшү жеке эле соодагерлердин көйгөйү эмес. Базардагы тамактануучу жайлардын ишине да таасирин тийгизбей койгон жок.

"Тамактарыбыз берилбей жатат, чайлар муздак. Мындай шартка карабай күндө келебиз, элдер да "жылуу болсо деле бере бериңиз" деп сурап жатышат. Билгениңиздердей базар абдан суук", - дейт тамактануучу жайдын бириндеги ишкер.