Баткенде өзбек жарандары менен болгон жаңжалда кыргыз чек арачысы жаракат алды

12-ноябрда Баткен облусунда чек арачылар менен Өзбекстандын жарандарынын ортосунда чатак чыгып, бир кыргыз чек арачысы жаракат алды.  

КРнын Чек ара кызматы билдиргендей, Баткен районунун Вариган аймагында чек арачылар кыргыз-өзбек чек арасына жакын жерден Дамас автоунаасын байкашып, (ал унаага жүктөлгөн пахта ошол жердеги кыргызстандык жарандын үйүнө түшүрүлгөн), аткезчиликке жол бербөө үчүн унаанын ээсин “Бел” чек ара бекетине алып барышты.

Бирок жолдо бара жатып өзбекстандык жаран унаасын чукул буруп, Өзбекстандын аймагына кире качкан. Чек арачы менен өзбек жаранынын ортосунда мушташ чыгып, окуянын күбөлөрү – чек арага чектеш жердеги Өзбекстандын тургундары күч колдонуу менен Кыргызстандын чек арачысынын куралын тартып алышкан.

Арттан жетип келген кыргыз чек арачылары бир нече эскертүү иретинде ок чыгарып, кесиптешин топтун арасынан алып чыгып, Айдаркендеги ооруканага жеткириптир. Учурда анын абалы канааттандырарлык.

Окуядан соң Баткен чек ара отрядынын жана Баткен облусу боюнча Чөлкөмдүк башкармалыктын өкүлдөрү чыр чыккан жерге келишти. Сүйлөшүүлөрдөн кийин өзбек чек арачылары тартып алынган куралды кайтарып беришти. Кыргыз тарап өзбекстандык чек арачылар менен жолугушуу өткөрүшүп, окуяны биргеликте иликтөө демилгесин көтөрүштү.