Талибандар Ооганстанда аскердик парад өткөрүштү

"Талибан" кыймылынын өкүлдөрү Ооганстанда аскердик парад өткөрүштү. Бул тууралуу чет элдик басылмалар жазышууда.

Басылмалардын жазганына караганда, аскердик парад Ооганстандын ири шаарларынын бири Кандагарда орун алган. Анда талибандар жаңы армияны түзүү үчүн ооган жана эл аралык күчтөрдүн мурдагы унааларын жана тик учактарын колдонушкан.

Аскердик унаалар аэропортту шаардын борбору менен байланыштырган Кандагардагы негизги жолду бойлоп өтүштү. Бул учурда диний музыка угулуп турган.

Маалымат үчүн: "Талибан" кыймылы Кыргыз өлкөсүнүн аймагында террордук жана экстремисттик уюм катары таанылып, ишмердүүлүгүнө тыюу салынган.

Буга чейин Ооганстанды басып алган "Талибан" кыймылы өлкөдө жүгүртүүдөгү чет элдик валютаны колдонууга тыюу салган.