Акылбек Жапаров Кытай элчиси Ду Дэвэнь менен инвестициялык кызматташтыкты талкуулады

Министрлер кабинетинин төрагасы Акылбек Жапаров Кыргыз Республикасындагы Кытайдын атайын жана ыйгарым укуктуу элчиси Ду Дэвэнь менен жолугушту. Бул тууралуу министрлер кабинетинин басма сөз кызматынан билдиришти.

Жолугушуунун жүрүшүндө эки тараптуу көп багыттуу кызматташтыктын маселелери талкууланды.

"Эки өлкөнүн негизги соода жана инвестициялык өнөктөштөрүнүн бири катары карайт жана өз ара кызыкчылык туудурган соода жүргүзүүнү өнүктүрүүгө, биргелешкен инвестициялык долбоорлорду ишке ашырууга кызыкдар. Биз товар жүгүртүү деңгээлин жогорулатуубуз зарыл. Министрлер кабинети инвесторлордун коопсуздугуна кепилдик берүүгө даяр", - деди Акылбек Жапаров.

Ду Дэвэнь өз кезегинде ар кыл тармактагы эки тараптуу кызматташтыкты өнүктүрүүгө жана чыңдоого умтулгандыгын билдирип, эки өлкө ортосунда өз ара ишеним жана өз ара аракеттешүү орнотулгандыгын кошумчалады.

Жолугушууда тараптар кыргыз айыл чарба продукциясын Кытай рыногуна экспорттоо, "Торугарт" жана "Эркеч-Там" көзөмөл-өткөрүү пункттары аркылуу жүк ташуучу унаалардын өтүүсүн жогорулатуу, "Түндүк-Түштүк" унаа жолунун курулушун жыйынтыктоо жана Кытай өкмөтү тараптан шаардын унаа жолдорун реконструкциялоо жана ирригацияга берилген гранттык каражаттардын өздөштүрүлүшү маселелерин талкуулады.