Азербайжан менен Армениянын чек арасында кайрадан куралдуу кагылышуу болуп, абал курчуганы айтылды

Азербайжан менен Армениянын чек арасындагы абал шейшемби күнү курчуп кетти. Армениянын Коргоо министрлиги кагылышуу учурунда каза болгондор катталганын маалымдап, Баку өкмөтүн чек араны бузууга айыптады. Азербайжан өкмөтү өз учурунда Арменияны айыптап жатат деп чет элдик ачык булактар жазышат.

Маалыматка ылайык, 8-15-ноябрда чек арада куралдуу кагылышуулар орун алган. Учурда бул кагылышуу күч алды.

"16-ноябрда Азербайжандын Коргоо министрлиги чек арада Армения тарап жардыруучу каражаттарды, ак атуучу куралдарды колдонгонун, анын кесепетинен эки аскер кызматкери жарадар болгонун маалымдады.

Өз кезегинде Ереван саат 16:00гө карата чек арадагы абал курч бойдон экенин, курман болгондор жана жарадар болгондор бар экенин билдирген", - деп айтылат маалыматтарда.

Ошондой эле айрым басылмаларда Армениянын 12 аскер кызматкери Азербайжандын аймагында туткунга түшкөндүгү айтылат.

Армения өкмөтү өлкөнүн коопсуздугун жана көз карандысыздыгы сактап калууга Орусиядан жардам сурап, кайрылуу жөнөтүшкөнү да кабарланды.