"Рыскелди Момбековдун дарегине айтылгандарды каралоо катары баалайбыз". УКМКнын билдирүүсү боюнча партия комментарий берди

Жогорку Кеңештин депутаттыгына талапкер Рыскелди Момбеков жогорку билими боюнча дипломду мыйзамсыз алганын УКМКнын Тергөө башкы башкармалыгынан маалымдаган. Буга байланыштуу Борбордук шайлоо комиссиясы Момбековдун талапкерлигин отурумда карамай болду.

Ал арада "Социал-демократтар" партиясынан Рыскелди Момбековдун жасалма диплому бар деген УКМКнын билдирүүсүнө комментарий беришти. Билдирүүдө дипломдун күтүүсүздөн текшерилиши оппозициядагы депутатка басым жасоо аракети менен түшүндүрүлөт.

"Эл аралык республикалык институттун (International Republican Institute) сентябрь айындагы сурамжылоосунун жыйынтыгы боюнча, "Социал-демократтар" шайлоого катышуучу партиялардын ичинен ишенимдүү түрдө экинчи орунда экени бийликти кыйнап жатат. Рыскелди Момбековдун дарегине айтылган мындай шылтоолорду биздин партия каралоо катары баалайт.

Момбеков 2010, 2015, 2020-жылдары депутаттыкка талапкер. Ал өткөн жылдын октябрь окуясындагы баш аламандыкта Ак Үйдөн дипломатиялык паспорту, диплому жана башка жеке документтери жоголуп кеткендиктен БШКга дипломунун күбөлөндүрүлгөн көчүрмөсүн тапшырган. Момбеков документтеринин жоголушу боюнча ИИМге арыз жазган, материалдар Кылмыштардын жана жоруктардын бирдиктүү реестринде каттоодо.

Коомчулуктан Рыскелди Момбековдун сүйлөгөн сөздөрүнүн оппозициялык мүнөзүн эске алып, биздин талапкерге кысым көрсөтүүнүн бирден-бир себеби катары кароону суранабыз", - деп айтылат партиянын билдирүүсүндө.