Бишкек ШИИБи: “Бакыт Букаевди мыкаачылык менен кыйнап өлтүрүшкөн”

Бишкек ШИИББи Бакыт Букаевдин өлүмү боюнча иликтөө жүргүзүп, факты боюнча алгачкы маалыматтарды берди. 13-ноябрда саат 18:53 чамасында Ленин райондук ИИБине чакыруу түшкөн. Анда Бишкек шаарынын Жаш Гвардия көчөсүндөгү №2 үйдө жансыз дене табылгандыгы тууралуу айтылган.

Текшерүүлөрдүн жүрүшүндө үйдүн эшиги бузулган эмес деп билдиришти. Батирдеги чачылган залда 1969-жылы туулган Бакыт Букаевдин кыйнап өлтүрүлгөн денеси табылды.

К.Н. аттуу күбөнүн айтымында, саат 18:00дө тааныштары чалып, Б.Букаевди таап берүүнү суранышкан. Ал ошол күнү бир кечеде тамадалык кылмак. Б.Букаевдин телефону өчүк болгондуктан, аталган күбө тамада жашаган батирге келген. Ачкычы бар болгондуктан батирге кирип, жансыз денени көргөн. 

Окуя боюнча соттук-медициналык экспертиза маркумдун денесиндеги жаракаттарды аныкташты. Анын моюну алды жагынан эки жолу кесилип, көкүрөгүнө эки жолу бычак сайылган. Көкүрөгүндө чылымдын чогу басылган 5 так калган. Кылмыш болгон жерден манжалардын издери, эки ашкана бычагы, кан болгон медициналык кол кап алынды. Бакыт Букаевдин сөөгү өлүмүнүн себептерин аныктоо үчүн соттук-медициналык экспертизага жөнөтүлдү.

Аталган факты боюнча "адам өлтүрүү" беренесине ылайык кылмыш иши козголду. Атайын иликтөөчү топ түзүлүп, алдын ала версиялар иштелип чыгууда.