Бакыт Букаевдин жансыз денесин Нурдөөлөт Копоев көрүп, милицияга кабарлаган

Шоумен, тамада Бакыт Букаевдин жансыз денесин кесиптеши, досу Нурдөөлөт Копоев көрүп, милицияга кабарлаган. Бул тууралуу бүгүн, 14-ноябрда Нурдөөлөт Копоев SUPER.KG порталына маалымат берди. 

Анын айтымында, Бакыт Букаев балдарын көрүү үчүн тез-тез эле Ысык-Көлгө барып турчу. Каза болгондон бир күн мурун Бакыт экөө жолукканын айтты.

“12-ноябрда Бакыт мага "Ысык-Көлдөн Бишкекке баратам" деп чалды. "Курсагым ачты" дегенинен биздикине келип тамактанып кетишин айттым. Экөөбүз тойдун видеосун көрүп отуруп тамактандык. Андан кийин тамагыбыз сиӊсин деп Бакыттын үйүнө чейин басып барганда "үйдү ремонт кылгам. Бир шкаф ашыкча болуп калды, алып кетпейсиӊби" дегенинен үйүнө кирдим. Ремонтун көрүп экөөбүз көпкө сүйлөшүп калдык. "Кеч болуп кетти, эртеӊ таӊкы эфирим бар" деп мен үйгө кеттим. Ал "эртеӊ, 13-ноябрда тоюм бар эле" деп да калды".  

Эртеси, 13-ноябрда тааныштарыбыз "Букаев тойго келбей жатат" деп издеп чыгышты. Анын кээде кан басымы көтөрүлүп кетмейи бар эле. Ооруп калган жокпу деп тынчсызданып, үйүнө бардым. Менде экинчи ачкыч бар эле. Биз кошуна жашайбыз. Келинчегим экөөбүз жер үйдө жашагандыктан, Бакыт "меникине келип жуунуп, кириӊерди жууп тургула" деп экинчи ачкычын берген.

Үйүнө издеп барганымда эшиги бек экен. Бирок үйүнүн свети жанып туруптур. Жарык күйүп тургандыктан, мендеги ачкыч менен ачып кирип барганымда сары кийими кызыл канга боёлгонун көрүп жүрөгүм түшүп калды. Дароо сыртка чыгып, эшикти жаптым. Эки мүнөт нес болуп туруп, анан милицияга кабарладым”,- деди Копоев.  

"Белгилүү тамада Бакыт Букаевди анын тааныштары өлтүргөн". Окуя боюнча ушундай гана версия каралып жатканын бүгүн бизге Бишкек ШИИББинин басма сөз кызматы билдирди.

Маалыматка ылайык, кылмышкер үйгө эшик аркылуу кирген. Учурда иликтөөчү топ Букаевдин жакын тааныштарынын арасында сурак жүргүзүүдө. Шектүү катары эч ким кармала элек. Кылмыш иши козголуп, тергөө жүрүп жатат.