Блогер Гусейн Гасанов унаа белек кылган Кыргыз жараны менен кайрадан жолукту

Блогер Гусейн Гасанов автоунаа белек кылган Кыргыз жараны Эген Апсаматов менен кайрадан жолугуп, үй-бүлөсү менен таанышты.

Блогер жолугушуу учурунда түз эфирде болгон. Анын айтымында, ал Эген Апсаматовдун ал-акыбалын көргөнү келген. Алар белекке берилген унаа турган унаа токтотуучу жайдан жолугушкан.

Апсаматов жакшы иштеп жатканын айтып, ага өкмөттөн телефон чалышып, колдоо көрсөтүп жатканын билдирди. Ошондой эле анын жубайы да ыраазычылыгын билдирип, кызынын жашоосу өзгөргөнүн айтты.

Кыргыз жараны блогерге беш жашар кызына операция жасатуу керектигин, анын кулагы жабык төрөлгөндүктөн угуусу начар экенин айткан. Блогер Апсаматов тартылган видеону жарыялагандан кийин миңдеген колдонуучулар Кыргыз жаранын куттуктап, айрымдары кызынын операциясына жардам сунушташкан. Мындан улам анын үй-бүлөсүнө жардам берүүнү каалагандар үчүн аккаунт ачылган.

Белгилей кетсек, 25-ноябрда блогер Гусейн Гасанов Москва шаарында аны бекер жеткиргени үчүн Эген Апсаматовго унаа белек кылганын Инстаграм баракчасына жарыялаган. Видеодо көрүнгөндөй, сапар учурунда ал киши Москвада карызын төлөп, кызынын операциясына акча чогултуу үчүн иштеп жүргөнүн айткан.

Буга чейин Эген Апсаматов SUPER.KG порталына маек берген.