Камырдан эмчек кап жасап талкуу жараткан сүрөтчү: "Мен нанды кордогон жокмун, салтты сактап жатам"

Бүгүн, 27-ноябрда социалдык тармакка сүрөтчү Алтынай Осмоеванын "Кыт, камыр, кийиз жана Ким Кардашьян" аттуу көргөзмөсүнө чакыруу иретинде даярдалган видео ролик коомчулукта талкуу жаратты. Видео тасмадан жаш кыздын камырдан аялдын эмчек кабын жасаганын көрүүгө болот. Социалдык тармактардын колдонуучулары "Обу жок аял, акмактык, кесир кылды, акылсыздык" деген пикирлерин калтырышкан. SUPER.KG порталы талкуу жараткан роликтин автору менен байланышты.

"Кыргыздарда нан улук нерсе. Биздин маданиятыбызды поп-маданият, Инстаграм, интернет бузуп жатат деген ойдо көргөзмөнү уюштурдум. Анткени жаштар Инстаграмдан түрдүү нерселерди көрүп жатышат. Ким Кардашьян учурда интернетте жылдыз болууда. Аны кыргыз кыздары жарашабы же жарашпайбы туурап, каш-кирпиктерди чаптап жатат. Бул эмне үчүн ушундай болуп жатат же биз да Ким Кардашьянга окшошуп калабызбы деген көргөзмө. Мен кыргыздын нанын кордогон жокмун. Мен кыргыздын салттарын сактап калуу максатын көздөп жатам. Кыздар табигый сулуулугун чанып, көздөрүн, оозун, төшүн чоңойтуп жатышат. Бул нан сыяктуу ыйык нерселерден баш тартуу сыяктуу болуп жатканын айткым келген. Көргөзмөнү көрбөй туруп сындап жатышат. Камырды кор кылган аялды уруш керек дегендердин комментарийлерин окуп чыктым. Ал жерден макал-лакаптарды жазып, кыргыздын ыйык нанга болгон мамилесин көрүп жүрөгүм жылыды. Болбосо ал жерде мени жамандап жатышат. Мен сүрөтчү катары кыргыздын таанылган материалдары кыт, кийиз жана камырды алдым. Негизи камырды эч качан материал катары колдонбойм. Анткени мен деле кыргызмын. Бул жерде камырды коомдо таасир берүү үчүн колдондум. Нанды бузган мен эмесмин, аны бузган поп-маданият. Мен аны болгону сүрөтчү катары чагылдырдым. Ниетим жакшы", - деди Алтынай Осмоева.