Бишкекте өткөн эл аралык форумда төрага Асылбек Жээнбеков Ч.Айтматовдун дүйнөлүк адабияттагы орду жөнүндө сөз сүйлөдү

“Айтматов ааламы мезгил өтсө да өз маанисин жоготпой, улам жаңы кырынан ачылууда. Көптөгөн өлкө өкүлдөрүнүн Ысык-Көл форумунун мындан көп жыл мурда козгогон идеяларын андан ары улантуу үчүн келишинин өзү эле - Айтматовдун алысты көрө билгенин, ал идеялардын эзели өчпөй турганын көрсөтүп турат”.  

Муну Жогорку Кеңештин төрагасы Асылбек Жээнбеков Ч.Айтматовдун 85 жылдыгына арналып бүгүн, 14-ноябрда Бишкекте өткөн эл аралык форумда айтты. Форум “Чыңгыз Айтматов жана анын Ысык-Көлү: маданият диалогу жана цивилизациялардын жакындашуусу” деп аталып, ага дүйнөнүн ондогон өлкөсүнөн өкүлдөр келип катышты.