Төрөт үйүнөн уурдалган ымыркай өз апасына берилди

Бишкекте №4-төрөт үйүнөн уурдалган ымыркай өз апасына берилди. Бишкек шаардык ички иштер башкы башкармалыгы билдиргендей, ымыркайга мурда Кызжибек деген ысым ыйгарылса, эми ысымы Октябрина болуп өзгөрүлөт. Кыздын атасы муну жоголгон ымыркайды таап берген Октябрь райондук ички иштер башкармалыгынын урматына жана кызынын октябрь айында төрөлгөнү менен байланыштырды. 

Кылмышка шектүү Нуржандын үйүн тинтүү учурунда Октябрь райондук жарандык абалдын актыларын каттоо бөлүмү 4-ноябрда берген туулгандыгы тууралуу күбөлүктүн көчүрмөсү табылды.

Эскерте кетсек, ымыркай 5-ноябрда уурдалып, 14-ноябрда Асанбай кичи районундагы №4-үйдөн табылды. Аны уурдаган айым №4-төрөт үйүнөн (ымыркай төрөлгөн төрөт үйү) бейтап болуп чыкты. Бул ишке башка адамдар да аралашканы айтылып, учурда иликтөө жүрүп жатат.