Өмүрбек Текебаевге кол салуу боюнча жактоочу Канат Хасанов: "Кийинки кезек кимде? Мендеби? Айтайын, атам. Бир-экөөнү ала жатам"

Жактоочу Канат Хасанов "Ата-Мекен" партиясынын лидери Өмүрбек Текебаевге кол салуу боюнча кайрылуу жасады. Кайрылуу видеосун ал социалдык тармактагы баракчасына жарыялады.

"70тей адам Өмүрбек Чиркешовичке келип кол салды. Алар 3 маршрутка менен алып кетебиз деп келишиптир. Урматтуу бийлик! Муну кандай түшүнсө болот? Эми ушундай ыкмага өттүңөрбү? Кийинки кезек кимде? Мендеби? Айтайын, атам. Бир-экөөнү ала жатам. Муну кандай түшүнсө болот?", - деди Хасанов.

Мындан тышкары, Канат Хасанов шайлоону тааныбай турганын айтып, Өмүрбек Текебаевге кол салгандар боюнча өлкө башчы Садыр Жапаровго, ички иштер министри Улан Ниязбековго жана УКМК башчысы Камчыбек Ташиевге кайрылды.

Кечээ, 1-декабрда "Ата-Мекен" партиясынын лидери Өмүрбек Текебаевге кол салуу болду. Көп өтпөй Текебаев телефонун кайтарып берүү боюнча кайрылуу жасады. Садыр Жапаров ИИМге Өмүрбек Текебаевге кол салуу боюнча фактыны иликтеп чыгууну тапшырды. Көп өтпөй Бишкек ШИИББи Өмүрбек Текебаевге кол салганга шектүү катары 23 жаштагы жаран кармалгандыгын билдирди.