1 жарым миллиард сомдон ашык зыян келтирилген. Башкы прокуратура коррупциялык схеманы аныктады

Мамлекеттик салык кызматынын жана башка мамлекеттик органдардын кызмат адамдары спирт ичимдиктерин өндүргөн ири компаниялар менен биргеликте акциздик салыктарды толук өлчөмдө төлөөдөн качуу боюнча туруктуу коррупциялык схема түзүшкөндүгү аныкталды. Бул тууралуу Башкы прокуратурадан билдиришти.

Маалыматка ылайык, 2013-2020-жылдары спирт ичимдигин өндүрүүдөн акциздик салыктардын көлөмү туруктуу мүнөздө төмөндөп, прогноздук көрсөткүчтөрдү аткарбоонун натыйжасында, республикалык бюджетке 1 миллиард 748 миллион сом салык түшпөй, мамлекетке ири суммадагы зыян келтирилген.

Тактап айтканда, Мамлекеттик салык кызматынын жана башка мамлекеттик органдардын кызмат адамдары спирт ичимдиктерин өндүргөн ири компаниялардын кызыкчылыгын көздөп, ченемдик укуктук актыларга жана акциздик жыйым маркаларын берүү жана колдонуу тартиби жөнүндө жобого өзгөртүүлөрдү киргизишкен. Мындан улам өндүрүүчүлөр тарабынан акциздик марканы жасалмалоого, тийиштүү салыктардын түрлөрүнөн качууга шарт түзүлгөн.

Бул коррупциялык схеманын найтыйжасында, 2013-2020-жылдар аралыгында мамлекетке 1 миллиард 7 миллион сомдон ашык зыян келтирилген.

Башкы прокуратура тарабынан аталган мамлекеттик органдардын жооптуу кызматкерлерине Жазык кодексинин 319-беренеси (коррупция) менен кылмыш иши козголуп, тергөө башталды.