Өзбекстанда орусиялык TikTok жылдыздары катышкан фестивалга тыюу салынды

Өзбекстандын Маданият министрлиги орусиялык белгилүү блогерлердин катышуусунда Ташкентте "TikTok Fest" фестивалын өткөрүүгө каршы чыкты. Концерт буга чейин токтотулган. Бул тууралуу коңшу өлкөнүн басылмалары жазышты.

Маалыматка ылайык, Маданият министрлиги фестиваль "социалдык тармактарда сын-пикирлерди жаратканына" шилтеме кылган. Министрликтин өкүлдөрү концертти өткөрүү “жаштардын аң-сезимине, дүйнө таанымына терс таасирин тийгизет” жана өзбек элинин “улуттук менталитетине туура келбейт” деп белгилешкен. Бул билдирүүдөн кийин фестивалга билеттер сатылган баракчалар ачылбай калган.

Концертке орусиялык белгилүү тик-токерлер Даня Милохин, Артур Бабич, Егор Шипа, Анет Сай, Ваня Дмитриенко жана Аня Покровдун катышуусу күтүлүп жаткан. Фестиваль 25-декабрда Борбор Азиядагы эң чоң муз аянтчасында өтмөк. Арена 12 миң 500 кишиге ылайыкталган.