Бишкекте чет элдик жаран тонолду. Шектүүлөр 19 жана 18 жаштагы балдар экени аныкталды

Бишкекте тоноого шектелип 19 жана 18 жаштагы балдар кармалды. Милициянын кайгуул кызматынан маалымдашкандай, шектүүлөр Пакистандын жаранын тоношкон.

Белгилүү болгондой, 6-декабрда болжол менен саат 19:40 чамасында Бишкек ШИИББдин нөөмөт бөлүмүнө тоноо боюнча маалымат келип түшкөн.

"Токтогул жана Логвиненко көчөлөрүнүн кесилишине барган милициянын кайгуул кызматкерлерине пакистандык жаран арыз менен кайрылган. Анда ошол эле даректен белгисиз эки бала Apple iPhone 11 үлгүсүндөгү телефонун тартып алып, качып кеткенин билдирген.

Ыкчам издөө иш-чараларынын жүрүшүндө кылмыш изи суй электе шектүү катары 2003-жылы туулган М.А. жана 2002-жылы туулган М.Э. аттуу балдар аныкталып, Биринчи Май РИИБинин тергөө кызматына жеткирилди", - дешти мекемеден.