"Бөйрөккө 4 жолу сайган". Бишкекте аялы күйөөсү тарабынан бычакталды

Бишкектеги ооруканада иштеген аял күйөөсү тарабынан бычакталды. Бул тууралуу жактоочу Шердор Абдыкапаров SUPER.KG порталына маалымдады.

"Мага жабыркаган аялдын апасы С.Кулмаматова кайрылды. Анын айтымында, кызы үй-бүлөлүк зомбулукка кабылган. Аны күйөөсү буга чейин да сабап келген. Акыркы жолу ооруканада жумушта жүргөн учурда арт жактан келип бөйрөккө 4 жолу бычак сайган. Аял бутунан да жаракат алган. Ал оор абалда ооруканада жатат. Ал эми күйөөсү Ленин РИИБине жеткирилген, бирок анын таасирдүү байланыштары бар болгондуктан ошол эле күнү бошотулган.

Жабырлануучунун апасынын "эмнеге камалбай калды?" деген суроосуна тергөөчү: "Аны камоого эч кандай негиз жок" деп жооп берген. Бычакталган аялдын күйөөсү мурда кылмыштуу топтун мүчөсү болгондугу айтылууда" - деди ал.