Бишкекте пневмониядан каза тапкан улук лейтенант Бердибай Элакуновдун жаркын элесине арналган футбол мелдеши өткөрүлдү

Бүгүн, 11-декабрда пневмониядан каза болгон милициянын улук лейтенанты Бердибай Элакуновдун жаркын элесине арналган футбол боюнча спорттук мелдеш өткөрүлдү. Бул тууралуу Ленин РИИБинин басма сөз кызматынан билдиришти.

Маалыматка ылайык, спорттук иш-чаранын ачылышында борбор калаадагы Ленин РИИБинин башчысы Бакытбек Нарчаев сөз сүйлөп, Бердибай Элакуновдун мекен алдында жасаган эрдиктерин эскерип, анын жубайы Мээрим Исаматовнага ыраазычылык билдирди.

Ал эми Мээрим Исаматовна өз сөзүндө милициянын бардык кызматкерлерине бул спорттук иш-чараны уюштургандыгы үчүн ыраазычылыгын айтты.

Мындан тышкары мелдештин ачылышына Ленин РИИБинин башчысынын орун басары Талгат Өскөналиев, өз алдынча кызматтардын жана ички иштер башкармалыктарынын бөлүмдөрүнүн жетекчилери жана каза болгон Бердибай Элакуновдун уулдары катышты.

Турнирде Ички иштер башкармалыгынын бардык түзүмдөрүнөн командалар күч сынашты. Катышуучулар оюндун алдында каза болгон милиция кызматкерлеринин жаркын элесин бир мүнөттүк унчукпоо менен эскеришти.

Мелдештин жыйынтыгында "2-ШМБдин милициянын участкалык уполномоченныйлары" командасы жеңүүчү аталды. Экинчи орунду "1-ШМБдин ыкчам криминалдык милиция кызматкерлери" командасы ээлесе, үчүнчү орунга Ленин районунун "1-ШМБдин милициянын участкалык уполномоченныйлары" командасы татыды.

Жеңүүчүлөргө Кубоктордон тышкары акчалай сыйлыктар дагы тапшырылды. Муну менен катар футбол мелдеши жыл сайын өткөрүлүп турары айтылды.