Токтобүбү Оргалча: "Жанар инимди бир тууган инимдей көрөм"

"Альянс" партиясынан парламенттин депутаттыгына талапкер Токтобүбү Оргалча социалдык тармактагы баракчасы аркылуу дагы бир жолу кайрылуу жасап, чындыкты бурмалабоого чакырып өттү. Андан сырткары биринчи айым Айгүл Жапарова менен байланышы жоктугун айткан.

"Мени уйгур, кытай, шпион деп жатышат. Бул чындыкка дал келбейт. Ат-Башыдан кеткен чериктин кызымын. Чоң-аталарыбыз 1916-жылы үркүндө Ат-Башыдан Кытайга үркүшкөн. Таятам болсо Ат-Башынын Талды-Суу айылынан үркүндө үркүшкөн. Сиздер чериктерди тааныбасаңыздар Кытайдагы манасчы Жусуп Мамай дагы черик. Мен ошол кишинин небереси болуп кетем.

Мен Кыргыз өлкөсүнүн жарандыгын алганда, Кытайдын жарандыгын расмий түрдө тапшыргам. Кечээ мандат берилгенден бери "биринчи айымдын досу экен, жакын экен" деген ушактар тарап жатат. Мен биринчи айымды жана президентти бир жолу да көргөн эмесмин. Мен жакындан да көргөн эмесмин, телевизордон анча-мынча көрүп жүрөм. Бул чындыкка дал келбейт, бирок ошол кишилердин саясатын колдойм. Чындыкка дал келбеген ушактар менен өзүңүздөрдү убара кылбаңыздар.

Жанар (ред. Жанар Акаев) инимди бир тууган инимдей көрөм. Жанар мени шайлоодо колдоп, кайын журтум Кадамжайга чейин барып келген. Экөөбүздүн ортобузда келишпестиктер жок. Кудайдын буйругу экен мыйзамдуу түрдө аялдардын квотасы менен келип жатам. Буга чейин "өтпөй калдым" деп айткан эмесмин, арызданган эмесмин. Ушуну түшүнбөй туруп эле мени жерден алып көргө чаап жатасыңар. Бири-бирибизди чукуй бербей, иш жасабайлыбы?", - деп айткан Оргалча.