Жарандык активист Адил Турдукулов: "Парламентке оппозициялык партиянын келиши жакшы көрүнүш". АПТАСОБОЛ

Борбордук шайлоо комиссиясы добуш берүүнүн жыйынтыгын чыгарып, бирдиктүү шайлоо округу боюнча Жогорку Кеңештин депутаттарын шайлоонун жыйынтыктарын аныктаган. Анда 6 партиянын тизмеси жарыяланган.

SUPER.KG порталы "Парламенттик шайлоонун жыйынтыгы чыкты. Депутаттык жаңы курамдан эл эмнени күтөт жана алар кандай иштейт деп ойлойсуз?" деген собол салды.

Жарандык активист Адил Турдукулов оппозициялык көз караштагы партиянын парламентке келиши жакшы көрүнүш экенин айтты.

"Жаңы Конституцияга ылайык, парламенттин анчалык укуктары жок. Укуктун баары аткаруу бийлигинде жана президентте болот. Президент кызматка киришип жатканда 3 жыл убакыт сураган. Эми 2023-жылы президенттин аткарган иштерин көрө жатарбыз.

Парламентке "Бүтүн Кыргызстан" партиясынын келгени жакшы деп ойлойм. Анткени парламентте оппозиция болушу керек. Ошону менен эле жаштардын келгени дагы жакшы көрүнүш. Мурдагы олигарх депутаттар дагы парламентке келишти. Алардын оозун жаап койгонго бийликтин ресурстары жетиштүү. Андайлар көз карандысыз элдик трибуна болуп берери күмөн жаратат", - дейт Турдукулов.