Депутат Бишкекте коомдук транспорттогу жол киренин баасын мектеп окуучуларына 10 сом кылууну сунуштады

Депутат Марлен Маматалиев Бишкекте коомдук транспорттогу жол киренин баасын мектеп окуучуларына 10 сом кылууну сунуштады. Бул тууралуу ал бүгүн, 20-декабрда парламенттин комитет жыйынында билдирди.

"Жол киренин баасы 15 сом болуп көтөрүлдү. Мектеп окуучуларына дагы 15 сомдон калтырылды. Окуучуларга 10 сомдон кылалы", - деди Маматалиев.

Вице-мэр Таалайбек Орозов: "Жаңы мыйзам боюнча тарифтерди бекитүү укугу мэрияга берилди. Мектеп окуучуларына жана студенттерге жол киренин көлөмүн азайтууну карап жатабыз", - дейт.

Депутат Эмил Токтошев башка мамлекеттерде окуучулар коомдук транспорттордо бекер жүрө турганын айтты. Мындан улам ал мектеп окуучуларына тарифти 8 сом кылууну сунуштады.

Депутаттар бул боюнча мэрияга тапшырма берүү чечимин кабыл алышты.