Дүйнөгө белгилүү араб миллиардерлеринин бири каза болду

Бириккен Араб Эмираттарында дүйнөгө белгилүү миллиардерлердин бири Мажид Аль Футтейм каза болду. Бул тууралуу БАЭнин премьер-министри Мохаммед ибн Рашид Аль Мактум твиттер баракчасы аркылуу билдиргенин чет элдик басылмалар жазып чыкты.

"Аллах Дубайдагы эң маанилүү жана кадыр-барктуу соодагерлердин бири болгон Мажид Аль Футтейм агабызга берекесин берсин. Аны өзүнүн кең бакчасына алып, үй-бүлөсүнө жана жакындарына сабыр берсин..." - деп жазган ал.

Мажид Аль Футтейм Жакынкы Чыгыштагы көптөгөн мейманкана жана соода борборлорунун ээси болгон. Ал 1992-жылы Дубайда "Majid Al Futtaim Holding" аталышындагы оюн-зоок жана чекене баада соода жүргүзүүчү компаниясын негиздеген. Аталган компания өзүнө 13 мейманкана жана 29 соода борборун камтыйт.

"Forbes" журналынын 2021-жылдагы маалыматына ылайык, ал араб дүйнөсүндөгү бай адамдардын арасында 3-сапка жайгашкан. Анда Мажид Аль Футтеймдин кирешеси 4 миллиард 300 миллион доллар экени жазылган.

Азырынча миллиардер канча жашта болгону жана өлүмүнүн себеби тууралуу маалыматтар ачыктала элек.