Рамзан Кадыровдун Эрдоганды коркутуусу Түркияда чоң резонанс жаратууда

Чеченстандын башчысы Рамзан Кадыров Түркиянын Кожаэли провинциясында Жохар Дудаев атындагы сейил бактын ачылышына кескин реакция кылып, Түркиянын президенти Режеп Тайып Эрдоганга кайрылуусу Түркияда кеңири резонанс жаратууда. Бул тууралуу чет элдик басылмалар жазышты.

Маалыматка ылайык, Рамзан Кадыров өзүнүн телеграм-каналында Чеченстандын биринчи президенти Ичкерия Дудаевди миңдеген жай тургундардын өлүмүнө катышкан террорист деп атаган. Буга байланыштуу сейил бак ачылгандан кийин ал Анкараны “террорчуларды колдойт” деп айыптаган.

"Мен Түркиянын президенти Режеп Тайып Эрдоганга ачык кайрылам: бир чечимге кел! Же террористтерди ачык колдогон мамлекет статусун аласың же ишенимиңди өзгөртпөстөн Орусия менен ачык-айкын жана чынчыл мамилени жакшыртасың", - деп жазган Чеченстандын башчысы.

Буга жооп кылып Кадыров "Күрдистан" жумушчу партиясынын негиздөөчүсү, Түркиянын түрмөсүндө өмүр бою эркинен ажыратылган Абдулла Ожаландын атын Грозный шаарында түбөлүккө калтырам деп коркуткан.

Мындан улам Түркиянын бир катар ЖМКлары Кадыровдун сөзүн коркунуч катары баалап, "Күрдистан" жумушчу партиясынын лидери Абдулла Ожаланды “террорист” деп атаган.

Өз кезегинде Орусия президентинин басма сөз катчысы Дмитрий Песков түрк бийлигинин Дудаевдин атын сейил бактардын бирине ыйгаруу чечимин Чеченстандын тургундары үчүн оор деп атаган.

"Бул Кадыровдун абдан эмоционалдуу, бирок түшүнүктүү реакциясы. Түркиядагы сейил бактардын бирине террористтин ысымы ыйгарылган. Албетте, бул бардык Чечен Республикасы үчүн өтө оор көрүнүш. Ошондуктан мындай эмоционалдык реакцияны түшүнсө болот", - деген Песков.